புதிய ஊடக சட்டமூலம்: டிஜிட்டல் சுதந்திரத்திற்கு விடுக்கப்பட்டுள்ள எச்சரிக்கை! – சமூக ஊடக அறிவிப்பு ஒன்றியம் கவலை

இலங்கை அரசாங்கத்தினால் ஜூன் 2026 இல் வர்த்தமானியில் வெளியிடப்பட்ட ‘இலங்கை பட்டய ஊடகவியலாளர் நிறுவனம்’ (Chartered Institute of Media Professionals of Sri Lanka) தொடர்பான சட்டமூலம், நாட்டின் டிஜிட்டல் சிவில் வெளி மற்றும் கருத்துச் சுதந்திரத்திற்கு பெரும் அச்சுறுத்தலாக அமைந்துள்ளதாக சமூக ஊடக அறிவிப்பு ஒன்றியம் (CSMD) தெரிவித்துள்ளது.  

இந்த சட்டமூலம் ஊடகத்துறையில் தொழில்முறை தரநிலைகளை நிலைநாட்டுவதாகக் கூறப்பட்டாலும், இது சுயாதீன ஊடகவியலையும் விமர்சனங்களையும் ஒடுக்குவதற்கான கருவியாக மாறக்கூடும் என அவ்வமைப்பு சுட்டிக்காட்டியுள்ளது.

அரசியல் தலையீட்டிற்கான வாய்ப்பு

இந்த சட்டமூலத்தின் பிரிவு 5(4) இன் கீழ், நிறுவனத்தின் முதல் வருடச் செயல்பாட்டிற்கான ‘இடைக்கால சபை’ அமைச்சரின் முழுமையான கட்டுப்பாட்டின் கீழ் அமையும். அமைச்சரால் நியமிக்கப்படும் உறுப்பினர்களைக் கொண்ட இந்த சபை, நிரந்தர சபையைத் தேர்ந்தெடுப்பதற்கான அடிப்படைக் காரணிகளைத் தீர்மானிக்கும் அதிகாரம் கொண்டது. இது சுயாதீனமான தொழில்முறை அடிப்படைகள் இன்றி, அரசியல் விருப்பு வெறுப்புகளின் அடிப்படையில் இந்த நிறுவனம் கட்டியெழுப்பப்படுவதற்கான வழிவகுக்கிறது.  

முக்கிய அச்சுறுத்தல்கள்:

1 டிஜிட்டல் படைப்பாளர்களைக் கட்டுப்படுத்துதல்: ஊடகவியலாளர்கள் மட்டுமல்லாது, யூடியூப் (YouTube), முகநூல் (Facebook) மற்றும் டிக்டாக் (TikTok) போன்ற தளங்களில் இயங்கும் உள்ளடக்க படைப்பாளர்களையும் “ஊடக வல்லுநர்கள்” என இந்த சட்டமூலம் வரையறுக்கிறது. இது அவர்களை அரச ஒழுங்குமுறைக்குள் கொண்டுவரும் முயற்சியாகும்.

2 தெளிவற்ற ஒழுக்காற்று விதிகள்: ‘தொழில்சார் துஷ்பிரயோகம்’ (Professional Misconduct) என்பதற்கு தெளிவான வரையறை இல்லை. அரசாங்கத்தை விமர்சிக்கும் எந்தவொரு உள்ளடக்கத்தையும் “ஒழுக்கமற்றது” என முத்திரை குத்தி, தண்டனை வழங்க இது வழிவகுக்கும்.  

3 முப்பரிமாண சட்ட வலை: இந்த சட்டமூலத்தின் கீழ் பதிவு இரத்து செய்யப்பட்டால், அது ஏற்கனவே உள்ள இணைய பாதுகாப்புச் சட்டம் (OSA) மற்றும் முன்மொழியப்பட்டுள்ள அரச பாதுகாப்புக்கான பயங்கரவாத எதிர்ப்புச் சட்டத்துடன் (PSTA) இணைந்து, சமூக ஊடகச் செயல்பாட்டாளர்களைக் கைது செய்யவும், உள்ளடக்கங்களை நீக்கவும் ஏதுவான ஒரு ஆபத்தான சட்டச் சூழலை உருவாக்கும்.

அரசாங்கத்திற்கு விடுக்கப்பட்டுள்ள கோரிக்கை

இந்தச் சட்டமூலம் நாட்டின் அரசியலமைப்பின் 14(1)(a) பிரிவின் கீழ் உறுதி செய்யப்பட்டுள்ள பேச்சு மற்றும் கருத்துச் சுதந்திரத்தை நேரடியாகப் பாதிக்கும் என CSMD எச்சரித்துள்ளது. இது ஊடகவியலாளர்கள் மற்றும் சமூக ஊடகச் செயல்பாட்டாளர்கள் மத்தியில் பயத்தினால் ஏற்படும் ‘சுய தணிக்கை’ (Self-censorship) யுகத்தை உருவாக்கும்.

எனவே, தொழில்முறை என்ற போர்வையில் சிவில் வெளியை ஒடுக்கும் இந்த சட்டமூலத்தை உடனடியாக மீளப் பெறுமாறு தேசிய மக்கள் சக்தி (NPP) அரசாங்கத்தை சமூக ஊடக அறிவிப்பு ஒன்றியம் வலியுறுத்தியுள்ளது. ஜனநாயக விழுமியங்களை மதிக்கும் அனைத்து சிவில் அமைப்புகளும் ஊடகச் சுதந்திரத்தைப் பாதுகாக்க ஒன்றிணையுமாறு அழைப்பு விடுக்கப்பட்டுள்ளது.