இலங்கையில் மே 11 முதல் மின்சாரக் கட்டணம் அதிகரிப்பு: முழுமையான விபரங்கள்

இலங்கையில் மின்சாரக் கட்டணத்தை அதிகரிப்பதற்கு இலங்கை பொதுப்பயன்பாடுகள் ஆணைக்குழு (PUCSL) உத்தியோகபூர்வமாக அனுமதி வழங்கியுள்ளது. இந்த புதிய கட்டணத் திருத்தம் எதிர்வரும் மே மாதம் 11ஆம் திகதி (திங்கட்கிழமை) முதல் அமுலுக்கு வரவுள்ளது.  

யாருக்கு இந்தக் கட்டண உயர்வு பொருந்தும்?

இந்தக் கட்டண அதிகரிப்பானது மாதமொன்றுக்கு 180 யூனிட்டுகளுக்கும் (Units) அதிகமாக மின்சாரத்தைப் பயன்படுத்தும் நுகர்வோருக்கு மாத்திரமே அமுல்படுத்தப்படவுள்ளது. இதன் மூலம் மொத்த நுகர்வோரில் சுமார் 5 சதவீதமானோர் பாதிக்கப்படுவர் என கணிக்கப்பட்டுள்ளது.  

விலை மாற்றங்கள் குறித்த விபரங்கள்:

உயர் மின்சார நுகர்வைக் கொண்ட வீடுகளுக்கான உத்தேச கட்டண உயர்வு பின்வருமாறு அமையும்:

• ரூ. 9,570 ஆக இருந்த கட்டணம் ➔ ரூ. 11,330 ஆக உயரும்.

• ரூ. 12,120 ஆக இருந்த கட்டணம் ➔ ரூ. 14,330 ஆக உயரும்.

• ரூ. 14,670 ஆக இருந்த கட்டணம் ➔ ரூ. 17,330 ஆக உயரும்.

• ரூ. 17,220 ஆக இருந்த கட்டணம் ➔ ரூ. 20,330 ஆக உயரும்.

யாருக்கு பாதிப்பு இல்லை?

மாதம் 180 யூனிட்டுகளுக்கும் குறைவாக (அதாவது ரூ. 6,420 க்கும் குறைவான கட்டணம் செலுத்துவோர்) மின்சாரத்தைப் பயன்படுத்தும் சாதாரண நுகர்வோருக்கு இந்த விலை அதிகரிப்பில் இருந்து விலக்கு அளிக்கப்பட்டுள்ளது. அரசாங்கத்தினால் வழங்கப்பட்ட ரூ. 15 பில்லியன் மானியம் காரணமாக, 95 சதவீதமான நுகர்வோர் இந்த அதிகரிப்பில் இருந்து பாதுகாக்கப்பட்டுள்ளதாக PUCSL தெரிவித்துள்ளது.