குடிவரவு திணைக்களத்தில் 98 இலட்சம் மோசடி: ஐடி கட்டுப்பாட்டாளர் அதிரடி கைது!

குடிவரவு மற்றும் குடியகல்வு திணைக்களத்தின் தகவல் தொழில்நுட்பம் மற்றும் உள்நாட்டுக் கட்டுப்பாட்டு பிரிவின் (IT & Internal Control) கட்டுப்பாட்டாளர், பாரிய நிதி மோசடி குற்றச்சாட்டின் கீழ் குற்றப்புலனாய்வு திணைக்களத்தினால் (CID) கைது செய்யப்பட்டுள்ளார்.

மென்பொருள் பெயரில் நடந்த முறைகேடு

அதிகாரபூர்வ மென்பொருளை நிறுவுவது தொடர்பான கொடுக்கல் வாங்கலில் இந்த மோசடி இடம்பெற்றுள்ளதாக விசாரணைகளில் தெரியவந்துள்ளது. குறிப்பாக, “User Management Module” எனும் மென்பொருளை நிறுவுவதற்காக ரூபா 9,831,250 பணம் செலுத்தப்பட்டுள்ளது. எனினும், அத்தகைய மென்பொருள் எதுவும் திணைக்களத்தில் நிறுவப்படவில்லை என சிஐடியின் நிதிக்குற்ற விசாரணைப் பிரிவு கண்டறிந்துள்ளது.

பணச் சலவை தடுப்புச் சட்டத்தின் கீழ் நடவடிக்கை

நிறுவப்படாத ஒரு தொகுதிக்கு அரசாங்க நிதியைப் பெற்றுக்கொண்டதன் மூலம் மோசடி செய்ததாக குறித்த அதிகாரி மீது குற்றம் சுமத்தப்பட்டுள்ளது. பணச் சலவை தடுப்புச் சட்டத்தின் கீழ் சந்தேக நபர் கைது செய்யப்பட்டுள்ளதாக பொலிஸார் உறுதிப்படுத்தியுள்ளனர்.

நீதிமன்ற நடவடிக்கை

அரசாங்க நிதியை தவறாகப் பயன்படுத்தியமை மற்றும் கையாடல் செய்தமை தொடர்பில் மேலதிக விசாரணைகள் முன்னெடுக்கப்பட்டு வருகின்றன. சந்தேக நபர் கடுவலை நீதவான் நீதிமன்றத்தில் ஆஜர்ப்படுத்தப்படவுள்ளார்.