ஸ்ரீலங்கன் ஏர்லைன்ஸ் நிறுவனம், வருமானம் அதிகரித்துள்ள போதிலும், 2026/27 நிதியாண்டின் முதல் மூன்று மாதங்களில் 35.6 பில்லியன் ரூபா வரிக்கு முந்தைய நட்டத்தைப் பதிவு செய்துள்ளதாக நிதி அமைச்சு தெரிவித்துள்ளது.
News First வெளியிட்டுள்ள செய்தியின்படி, நிதி அமைச்சின் இடைக்கால நிதிநிலை அறிக்கையில் இந்தத் தகவல் தெரிவிக்கப்பட்டுள்ளது.
அறிக்கையின்படி, குறித்த மூன்று மாத காலப்பகுதியில் விமான நிறுவனம் 82.8 பில்லியன் ரூபா வருமானத்தை ஈட்டியுள்ளது. கடந்த நிதியாண்டின் இதே காலப்பகுதியில் இந்த வருமானம் 62.6 பில்லியன் ரூபாவாக இருந்தது.
எனினும், நிறுவனத்தின் செலவினங்கள் 40.4 சதவீதத்தால் அதிகரித்து 67.8 பில்லியன் ரூபாவிலிருந்து 95.2 பில்லியன் ரூபாவாக உயர்ந்துள்ளன.
மத்திய கிழக்கில் தொடரும் மோதல் நிலைமையால் விமான எரிபொருள் செலவு 93 சதவீதத்தால் அதிகரித்ததே செலவின உயர்வுக்கான பிரதான காரணமாக அறிக்கையில் குறிப்பிடப்பட்டுள்ளது.
இதன் விளைவாக, குறித்த காலாண்டில் நிறுவனம் சுமார் 12.5 பில்லியன் ரூபா செயற்பாட்டு நட்டத்தையும் பதிவு செய்துள்ளது. அந்நியச் செலாவணி தொடர்பான அழுத்தங்களும் நிறுவனத்தின் நிதிச் செயல்திறனைப் பாதித்துள்ளதாகத் தெரிவிக்கப்பட்டுள்ளது.
மேலும், நிறுவனத்தின் நிதி நிலைத்தன்மையைப் பாதிக்கும் முக்கிய சவால்களாக கட்டமைப்பு ரீதியான பலவீனங்கள், பணப்புழக்கக் கட்டுப்பாடுகள், அதிக பராமரிப்புச் செலவுகள் மற்றும் கணிசமான கடன் பொறுப்புகள் ஆகியவற்றை நிதி அமைச்சு சுட்டிக்காட்டியுள்ளது.
இதற்கிடையில், தேசிய விமான சேவை நிறுவனத்திற்கு அரசாங்கம் தொடர்ந்து நிதி உதவிகளை வழங்கி வருகின்றது.
175 மில்லியன் அமெரிக்க டொலர் கடன் மறுசீரமைக்கப்பட்டதைத் தொடர்ந்து, மறுசீரமைக்கப்பட்ட வங்கிக் கடன் பொறுப்பான 126.5 மில்லியன் அமெரிக்க டொலர் கடந்த மார்ச் 20ஆம் திகதி அரசாங்கத்தின் கடன் தொகையில் சேர்க்கப்பட்டுள்ளது.
அத்துடன், நிறுவனத்தின் குறுகியகால நிதித் தேவைகளைப் பூர்த்தி செய்வதற்காக மேலும் 30 மில்லியன் அமெரிக்க டொலர்களும் வழங்கப்பட்டுள்ளன.
ஸ்ரீலங்கன் ஏர்லைன்ஸின் நீண்டகால நிதி நிலைத்தன்மை மற்றும் அதன் நிதிச் சுமை அரசாங்கத்தின் பொது நிதியில் ஏற்படுத்தக்கூடிய தாக்கம் தொடர்பான கவலைகள் தொடரும் நிலையில், இந்த நிதி அறிக்கை வெளியாகியுள்ளது.
